Finn ikkje brannårsaka

HUSØY: - Alt er svidd opp, seier lensmann Reidar Gaupås.

Det var natt til 6. mars at den store lagerhallen og verkstaden på Husøy vart totalskadd i brann. Kriminalteknikarane i politidistriktet trur dei har lokalisert kvar brannen starta, men ser seg likevel ikkje i stand til å finne ei årsak.

Gaupås fortel at det truleg brann mellom halvanna og to timar før det vart varsla om brannen.

- Eg veit ikkje om det har noko med brannvarslingssystemet å gjera. Det vil etterforskinga vise, seier lensmannen.

Avhør

Politiet driv framleis med taktisk etterforsking av brannen. Dei samlar inn spor og driv avhør.

Politiet ville opprinneleg ha bistand frå Kripos i etterforskinga.

Gaupås trur ikkje at ei manglande brannårsak vi ha noko og sei for forsikringsutbetaling.

- Hadde vi funne ein grunn og at nokon kunne stillast til ansvar kunne det vore eit større problem, kommenterar Gaupås.

Dersom det ikkje dukkar opp nye spor i saka reknar ikkje politiet med å finne nokon brannårsak. Gaupås trur etterforskinga vil halde fram eit par veker.
 

Publisert tirsdag 16. mars 2010 kl. 12:50.
Sist oppdatert tirsdag 16. mars 2010 kl. 12:50.